شعری از شاعر پيشكسوت كلهر، كرمرضا كرمی در سوگ يدالله رحمانی

'د‌ی چريكه‌ی بۆڵبۆڵ دڵااهوو نیه‌تێد'

داڵاهوو شيوه‌ن، بیستوین زار‌‌ی

خه‌وه‌ر‌ی پیچياس، له كورده‌وار‌ی
بيلن بناڵم، ناڵه‌م ته‌سكینه
برام بار كرد‌یه، له‌ی سه‌رزه‌مینه
برام بار كردیه، من خه‌م وه كووڵم
ده‌س و ده‌م له خوین، پشتِ سه‌ر چووڵم
خه‌م و ئاخ و داخ، نيشتيه له جه‌رگم
وه مه‌رگت قه‌سه‌م، راز‌ی وه مه‌رگم
دڵه‌ی زه‌خمبارم، زامی بوی تازه
ئمروو داڵاهوو، كز و بی‌نازه
باخ، تۆعمه‌ی خه‌زان، بۆڵبۆڵ مات خه‌م
سه‌ریل پووشايه، خامه‌ی تار و ته‌م
نازك خياڵان، گۆڵ جوانه‌مه‌رگ بوی
سوول خرامان، بی شاخ و به‌رگ بوی
داڵاهوو خه‌مبار، قه‌‌ڵاجه شينه
په‌راو بیستوین گشتی ئاخينه

داخی داچه‌كان، سقان و پووسم

چه بكه‌م له‌ ناكاو، باركردیه دووسم
ئمروو داڵاهوو، مات و كز و كوور
نه ده‌نگ ده‌ف تێد، نه ناڵه‌ی سه‌نتوور
هه‌ورِ خه‌م گرديه، سه‌ر قۆله‌ی به‌موو
شينه، شيونه، و‌ه‌ره‌و داڵاهوو
بيستوین پووشاس، سيا‌ی قه‌ترانی
هاله هيمه‌روو، ته‌رم ره‌حمانی
يا من كه‌ر بویمه، يا بۆڵبۆڵ ماته
شای بۆڵبۆڵان، چی له‌ی وڵاته
د‌ی چريكه‌ی بۆڵبۆڵ داڵاهوو نیه‌تێد
نه‌وا‌ی مووسيقی، كه‌ژ و كوو نیه‌تێد
داخ روی داخان، سه‌ر به‌ساتم روو
ناڵه‌ی دڵته‌نگی ئه‌ڵوه‌ناتم روو
بۆڵبۆڵ بی ده‌نگ، بی‌زووانم روو
هه‌ساره‌ی هۆنه‌ر، گه‌رميانم روو
بویشن وه ئه‌ڵوه‌ن، ئه‌لان بناڵی
ره‌حمانی پرسيد، وه سووز حه‌واڵی
كووچ و كووچ‌باره، وه‌ره‌و داڵاهوو
هه‌ی داد هه‌ی بيداد، ره‌حمانییم روو
هه‌ی داد سۆڵتان سووخته دڵان چی
لاڵ بوود زووانم، شا‌ی بۆڵبۆڵان چی
شين 'نه‌كيسا' و پرس 'باربده'
هايم له شار خه‌م، له ئی سه‌رحه‌ده
بيلا يه‌ی ساتی بویم وه هاوده‌مد
خه‌مين مه‌نيشه، بویه بار خه‌مد
كووچ و كووچ باره وه‌‌ره‌و داڵاهوو
ماڵ يه‌دۆڵای، ياران ها له كوو؟
بايه‌د قه‌بویل كرد، ئيمه‌يش ریواريم
ئاخر گشت ساكن، سينه‌ی مه‌زاريم

'که‌ره‌مرزا که‌ره‌می'

لطفاً در صفحه‌ی کرماشان در فیسبوک عضو شوید.

نوشته کرماشـــــان در تاريخ شنبه, خرداد ۲۸, ۱۳۹۰

ارســـال به: :: :: :: :: :: :: :: :: :: :: :: ::